Joan den ostegunean, urriaren 22an, Erevango (Armenia) Aram Khachaturian Museoak euskal kulturaren nazioarteko proiekziorako garrantzi handiko musika-topaketa bat hartu zuen. Josu Okiñena piano-jotzaile eta ikertzaileak eta Natalia Tchitch biola-jotzaileak emandako kontzertuak ikusmin handia piztu zuen bertako entzuleen artean, eta lotura artistiko berriak sortzeko bidea eman zuen bi herrialdeen artean. «Euskal musika munduarekin elkarrizketan» lelopean, errezitaldiak gure musika-ondarearen orrialde esanguratsuenetan zeharreko ibilbide bat proposatu zuen, Emiliana de Zubeldia, Aita Donostia, Jesus Guridi, Hilario Olazaran Tuterakoa eta Maurice Ravelen konposizioekin, euskal sorkuntzaren aberastasuna, aniztasuna eta nortasuna agerian utziz.

Egitarauak dimentsio berezia hartu zuen bi interprete armeniar nabarmenen partaidetzari esker: Karen Shahgaldyan biolin-jotzailea eta Sevak Avanesyan biolontxelo-jotzailea, Okiñena eta Tchitchekin batera oholtzan aritu zirenak. Ganbera-talde ezberdinen bidez —duoak, trioak eta laukotea—, musikarien artean benetako elkarrizketa artistikoa sortu zen, non euskal errepertorioa Robert Schumann eta Johannes Brahms bezalako europar musikagile handien obrekin uztartu baitzen. Dimentsio musikal hutsaz harago, kontzertua kulturen arteko topagune aberasgarria izan zen. Publikoaren harrera bikainak, euskal obrek piztutako interesak eta interpreteen arteko kidetasun artistiko estuak musika unibertsalaren ospakizun bihurtu zuten gaualdia, tradizio, sentiberatasun eta kultura-nortasun desberdinak hurbiltzeko gai den hizkuntza gisa. Armeniako lehen topaketa honek, gainera, bi herrialdeetako musikari eta kultur erakundeen arteko lankidetzarako bide berriak zabaltzen ditu, etorkizuneko proiektuetan jarraipena izan nahi duen harreman baten oinarriak finkatuz. Esperientziak erakutsi du euskal musikak nazioarteko ikusleekin konektatzeko ahalmen handia duela, bereziki beste tradizio batzuetako musikari eta errepertorioekin elkarrizketan aurkezten denean.

Hurrengo geltokia: Errumania, azaroaren 23an

Armenian izandako arrakastaren ondoren, proiektuak nazioarteko ibilbidearekin jarraituko du datorren azaroaren 23an Piteștin (Errumania); bertan, Josu Okiñenak eta Natalia Tchitchek egitarau bera aurkeztuko dute Piteștiko Filarmonikaren kontzertu-denboraldian. Hitzordu berri honek jarraipena emango dio euskal ondare musikala nazioarteko agertokietan kokatzea, balio artistiko handiko lanak berreskuratzea eta zabaltzea, eta herrialde desberdinetako musikari eta entzuleen arteko topaketa bultzatzea helburu duen ekimenari. Eusko Jaurlaritzaren babesa duen «Euskal musika munduarekin elkarrizketan» proiektuak funtsezko uste bati erantzuten dio: gure musika-ondareak ez du bere jatorrizko eremu geografikora mugatuta geratu behar; aitzitik, nazioarteko musika-bizitzaren parte aktibo izateko behar besteko kalitatea eta adierazkortasuna ditu. Erevandik Piteștira, euskal musikak bere bidaiari eusten dio, topagune berriak eraikiz eta kultura herrien artean zubi iraunkorrak eraikitzeko tresnarik baliotsuenetako bat dela frogatuz.